Toshkent mahallalari

Ushbu roʻyxatda Toshkent shahrining mahallalari tumanlar kesimida keltirilgan.

2016-yil iyul oyi maʼlumotlariga koʻra, Toshkent shahrida 505 ta mahalla bor.

2016-yil 21-apreldagi Xalq deputatlari Toshkent shahar kengashining 111/14-5-sonli qaroriga binoan Toshkentdagi 104 ta mahalla qayta nomlandi. Bunda Toshkent tumanlarida bir-birini takrorlovchi nomlar boshqa muqobiliga almashtirildi, shuningdek, ayrim mahalla nomlari (masalan, Mirzo Ulugʻbek tumanidagi Oltintepa-10 mahallasi nomi Oltintepa mahallasi deb oʻzgartirildi) tartibga keltirildi.

2020-yil 25-sentyabrda Toshkentning oʻn ikkinchi tumani – Yangihayot tumani tashkil etildi. Yangihayot Toshkent shahrining Sergeli, Bektemir va Toshkent viloyatining Zangiota, Quyichirchiq, Yangiyoʻl, Oʻrtachirchiq tumanlari chegaralarini oʻzgartirish orqali tashkil etilgan.

2020-yil 9-iyulda qabul qilingan Xalq deputatlari Sergeli tumani kengashining 66/2-10-sonli qarori bilan Sergeli tumanining 13 ta mahallasi – Al-Fargʻoniy, Doʻstlik, Humo, Navqiron, Olchazor, Tashabbus, Viqor, Yangi umid, Yangi Choshtepa, Yorqin hayot, Yoʻldosh, Charogʻon, Chorbogʻ toʻliq; 6 ta mahallasi – Daryo boʻyi, Joʻnariq, Past Darxon, Qipchoq, Sofdil, Choshtepa qisman Yangihayot tumaniga oʻtkazilgan.

2023—2024-yillarda oʻtkazilgan Xalq deputatlari Toshkent shahar kengashining qarorlariga binoan 2024-yil 25-oktyabr holatiga koʻra, Toshkent shahrida 585 ta mahalla bor. Xususan, Bektemir tumanida 18 ta (ilgari 12 ta edi), Mirobod tumanida 39 ta (ilgari 39 ta edi), Mirzo Ulugʻbek tumanida 70 ta (ilgari 54 ta edi), Olmazor tumanida 64 ta (ilgari 58 ta edi), Sergeli tumanida 46 ta (ilgari 39 ta edi), Uchtepa tumanida 60 ta (ilgari 60 ta edi), Yakkasaroy tumanida 21 ta (ilgari 21 ta edi), Yangihayot tumanida 30 ta, Yashnobod tumanida 67 ta (ilgari 57 ta edi), Yunusobod tumanida 64 ta (ilgari 63 ta edi), Shayxontohur tumanida 51 ta (ilgari 51 ta edi), Chilonzor tumanida 55 ta (ilgari 51 ta edi) bor.