Roberto Mancini

Roberto Mancini

Mancini (2024-yil)
Shaxsiy maʼlumot
Toʻliq ismi	Roberto Mancini
Tavallud sanasi	1964-yil 27-noyabr (1964-11-27) (61 yosh)
Tavallud joyi	Jesi, Italiya
Boʻyi	1.79 m
Ampluasi	Hujumchi
Professional faoliyati*
Yillar	Jamoa	Isht.	(Gol.)
1980—1982	Bologna	30	(9)
1982—1997	Sampdoria	424	(132)
1997—2001	Lazio	87	(15)
2001	→  Leicester City	4	(0)
Total		545	(156)
Boshqargan klublari
2001—2002	Fiorentina
2002—2004	Lazio
2004—2008	Inter Milan
2009—2013	Manchester City
2013—2014	Galatasaray
2014—2016	Inter Milan
2017—2018	Zenit Saint Petersburg
2018—2023	Italiya
2023—2024	Saudiya Arabistoni
2025—	Al-Sadd
*Professional klublardagi gollari (ichki chempionat)

Roberto Mancini (talaffuzi: Roberto Manchini; 1964-yil 27-noyabrda tugʻilgan) — sobiq italiyalik futbolchi, ayni damda Qatarning Al-Sadd klubi bosh murabbiyi.

Futbolchi sifatida Manchini ikkinchi hujumchi (deep-lying forward) pozitsiyasida oʻynagan va „Sampdoria“dagi faoliyati bilan mashhur boʻlgan. U bu klub safida 550 dan ortiq oʻyin oʻtkazib, jamoaning oʻz tarixidagi ilk A Seriya chempionligini, toʻrtta Italiya kubogi va Yevropa Kubok Gʻoliblari Kubogini qoʻlga kiritishiga yordam bergan. Italiya terma jamoasi safida 36 marta maydonga tushgan va UEFA Yevro-1988 hamda 1990-yilgi futbol boʻyicha Jahon chempionatida ishtirok etgan. Har ikkala turnirda ham jamoasi bilan yarim finalgacha yetib borgan, biroq 1990-yilgi musobaqada birorta oʻyinda maydonga tushirilmagan. 1997-yilda, „Sampdoriya“dagi 15 yillik faoliyatidan soʻng, Manchini klubni tark etib, „Lazio“ safiga qoʻshilgan va u yerda yana bir skudetto hamda Kubok Gʻoliblari Kubogini, shuningdek, UEFA Superkubogi va yana ikkita Italiya kubogini qoʻlga kiritgan. U Gianluigi Buffon bilan birga Italiya kubogini eng koʻp (6 marta) yutgan futbolchi hisoblanadi. Futbolchilik davrida Manchini koʻpincha tanaffus vaqtida jamoadoshlari bilan suhbatlashib, ularni ruhlantirib turardi. Oʻyinchi sifatidagi faoliyatining soʻnggida u „Latsio“da Sven-Göran Erikssonga yordamchi boʻlib ishlagan.

Uning murabbiylikdagi ilk faoliyati 2001-yilda, atigi 36 yoshida „Fiorentina“da boshlandi va u jamoasi bilan Italiya kubogini qoʻlga kiritdi. Keyingi mavsumda esa „Latsio“ jamoasini boshqarib, klubni yana bir bor Italiya kubogi sohibi boʻlishiga yordam berdi. 2004-yilda Manchiniga „Inter Milan“da murabbiylik qilish taklif etildi va u bu jamoa bilan ketma-ket uchta A Seriya chempionligini qoʻlga kiritib, klub rekordini oʻrnatdi; 2008-yilda esa lavozimidan ozod etildi. Bir yildan ortiq vaqt futboldan chetda qolgan Manchini 2009-yil dekabrida „Manchester City“ bosh murabbiyi etib tayinlandi. U 2010–11-yilgi mavsumda „Siti“ga Angliya kubogini yutishda koʻmaklashdi — bu klubning 35 yil ichidagi ilk yirik sovrini edi — va 2011–12-yilgi mavsumda jamoani 44 yil ichida ilk bor mamlakat chempioni qildi. Manchini 2013-yil sentyabrida Turkiyaning „Galatasaray“ klubida murabbiylik faoliyatini boshlab, oʻzining yagona mavsumida Turkiya kubogini qoʻlga kiritdi, soʻng Rossiyaning „Zenit“ jamoasini boshqarishdan avval yana ikki yil davomida „Inter“ jamoasida ishlagan. 2018-yilda Italiya terma jamoasi JCh-2018 saralashidan oʻta olmagach, Manchini uni boshqaruvga oldi. 2021-yilda u Italiyani Yevro-2020 musobaqasida gʻoliblikka olib keldi va bu jamoaning tarixdagi ikkinchi Yevropa chempionligi boʻldi. Uning boshqaruvida jamoa 2018-yil oktyabridan 2021-yil oktyabrigacha magʻlubiyat nimaligini bilmadi va ketma-ket magʻlubiyatsiz oʻyinlar soni (37) boʻyicha jahon rekordini oʻrnatgan. Biroq shundan soʻng Italiya pley-offda Shimoliy Makedoniyaga yutqazib, ketma-ket ikkinchi bor Jahon chempionatiga chiqa olmadi.

Manchini murabbiylik faoliyatining 2002-yildan 2014-yilgacha boʻlgan har bir mavsumida yirik milliy kubok musobaqalarining kamida yarim finaliga qadar yetib borgan. U bir qator rekordlar sohibi, jumladan, 2004-yildan 2008-yilgacha Italiya kubogi finallarida ketma-ket ishtirok etgan: 2004-yilda bir marta „Latsio“ bilan va keyingi toʻrt mavsumda „Inter“ bilan.