Jahongir Poziljonov

Jahongir Poziljonovning otasi G‘ayratjon, onasi Mapuraxon aya 2015-yilda vafot etgan. U „Boyvachcha“ filmini tasvirga olish jarayonida boʻlajak rafiqasi bilan tanishib qoladi. Toshkent tibbiyot akademiyasi talabasi Dildora dugonalari bilan filmda epizod rol oʻynash uchun kelgan boʻladi. Bu juftlik 2008-yilda oila qurishadi va ularning hozirda 5 farzandi, 2 oʻgʻil va 3 qizlari bor. Katta oʻgʻliga Gʻayratjon deb otasining ismini, yana bir oʻgʻliga esa Moʻmin Oripovning ismini qoʻygan. Toʻngʻich qiziga Rayhon deb ism qoʻygan.

2009-yilda „Bojalar“ guruhi Termizda konsert dasturini oʻtkazib, ortga qaytish paytida avtohalokatga uchragan. Shu joyning oʻzida Moʻmin Oripov vafot etgan, Jahongir Poziljonov esa oʻgʻir ahvolda shifoxonaga olib borilgan va bir necha kun koma holatida boʻlgan. Oʻziga kelganida ham sogʻligʻini tiklash qiyin kechgan va oyogʻi singanligi uchun ancha paytgacha oqsoqlanib yurgan.

2014-yilda Botir Aliyev soʻzi va Eldor Qayumov musiqasi bilan kuylagan „Toʻylar muborak“ qoʻshigʻi „Yil qoʻshigʻi – 2014“ mukofotiga loyiq topilgan. U faoliyati davomida koʻplab xonandalar bilan deut kuylagan. Jumladan, Nilufar, Orolmirzo Safarov, Rayhon, Ulugʻbek Rahmatullayev, Shahzoda, Qilichbek Madaliyev va boshqalar.

Uning qoʻshiq va kliplarini ommabop boʻlsada, 2018-yilda Dilafroʻz Hayitmetova bilan ijro qilgan „Mehmonim“ qoʻshigʻi O‘zbekkonsert tomonidan televideniyeda koʻrsatilishiga ruxsat berilmagan. Bundan tashqari u Shavkat Mirziyoyevga atab qoʻshiq ijro qilgan. Bir qancha vaqtdan soʻng bu qoʻshiq boʻyicha O‘zbekkonsert surishtiruv ishlarini boshlagan. „Oʻzbekkonsert“ davlat muassasasi rahbari Odil Abduqahhorov esa quyidagicha fikr bilgirgan:

Ushbu qoʻshiq Zoʻr TV kanali bilan hamkorlikda olingan va keng jamoatchilik noroziligiga sabab boʻldi. Prezidentimiz sanʼatkorlarning reklamasiga muhtoj emas. Davlatimiz rahbarining amaliy ishlari sabab, butun dunyo tan olmoqda. Biz bugun J. Poziljonovga indamasak, ertaga boshqasi ham shunaqa qoʻshiq aytib chiqishi mumkin. Kimgadir yaxshi koʻrinishni istayotganlar xalq uchun xizmat qilib, oʻz ishini mas`uliyat bilan qilsin.

Jahongir Poziljonovning ilk roli rejissyor Rustam Saʼdiyevning 2004-yilgi „Muhabbat sinovlari 2“ filmida boʻlgan, lekin koʻpchilik uni „Sevinch“ filmidagi roli bilan tanigan.