Ariana Grande

Nickelodeon telekanalida efirga uzatilgan teleserialdagi rolidan avval Grande Broadway teatrida 2008-yilda sahnalashtirilgan 13 nomli myuziklda Charlotte personajini ijro etadi. U myuziklga qoʻshilganda, tahsil olayotgan maktabi — North Broward maktabidagi darslarda ishtirok eta olmaydi, ammo oʻqishni davom ettirdi; maktab unga tahsil olishi uchun materiallar yuborib turdi. U, shuningdek, boʻsh vaqtlarida New York shahrida joylashgan „Birdland“ jaz klubida qoʻshiq kuylab turgan.

2010-yildan 2013-yilgacha Grande Nickelodeon telekanalida efirga uzatilgan shou — Victoriousda Cat Valentine qahramonini jonlantiradi. Uning roli Grandega oʻsmirlar idoli statusiga ega boʻlishida koʻmaklashdi, ammo u koʻproq musiqiy karyeraga qiziqib, aktyorlikni „zavqli, lekin musiqa har doim men uchun birinchi boʻlgan“ deya taʼrifladi. 2012-yilning avgustida Nickelodeon Victorious teleseriali uch faslgacha davom etishini eʼlon qiladi. Biroq, shu oyning soʻngida, Nickelodeon Sam & Cat nomli spin-off shou efirga uzatilishini eʼlon qiladi. Bu shouda Victorious serialidagi Grande bilan iCarly serialidagi Jennette McCurdy birlashishadi. Ular Sam & Cat shousida Cat Valentine va Sam Puckett oʻlaroq rollarini oʻynashadi.

Garchi Sam & Cat Nickelodeon uchun muvaffaqiyatli shou boʻlgan boʻlsa-da, Grandening musiqiy karyerasi va boshqa muammolari tufayli shou 2014-yilning 13-iyulida bekor qilinadi. Shouning soʻnggi qismi 17-iyulda efirga uzatiladi.

Grande oʻzining debyut albomi boʻlmish Yours Truly (dastlab nomi Daydreamin' boʻlgan) uchun uch yil vaqt sarflaydi. U ushbu albomni 2013-yilning iyunida niholaydi, 2013-yilning avgustida esa chiqariladi. 2013-yilning sentyabrida bu albom AQSh Billboard 200 albomlar chartida birinchi raqamli albom boʻldi va ilk haftaning oʻzidanoq 138 000 ta nusxada sotildi. Bu Grandeni Keshadan keyin ilk albomidanoq chartda birinchi raqamni band qilgan ilk ayol artistga aylantirdi. Albomning ilk singli — „The Way“ pitsburglik rapper Mac Miller bilan birga ijro etilgan boʻlib, 2013-yilning 26-martida chiqarilgan. Ushbu ashula chiqarilganidan boshlab hisoblaganda, 48 soat ichida 120 000 ta nusxada sotildi, ochilish haftasida esa 219 000 tadan oshiq nusxada sotildi. Shuningdek, birinchi albom singllari oʻlaroq „Baby I“ va „Right There“ singllari ham chiqarilgan.

2014-yilning yanvarida Grande ikkinchi studiya albomi ustida ishlashni boshlaydi. U albomni 2014-yilning martida nihoyalaydi. Albomning birinchi singli „Problem“ boʻlib, bu ashula avstraliyalik rapper Iggy Azalea bilan birga kuylangan. Bu tarona 27-aprelda 2014 Radio Disney Music Awards taqdimotida premyera qilingan. Albomning ikkinchi singli „Break Free“ rus—olmon produser Zedd bilan birga ijro etilgan boʻlib, qoʻshiq premyerasi 2-iyulda, MTV telekanalida efirga uzatiladigan Total Request Live shousining Total Ariana Live deb nomlangan bir kunlik epizodida boʻlib oʻtadi. 2014-yil 28-iyulda Grande 25-avgustda chiqarilishi kutilayotgan My Everything albomi nomini eʼlon qiladi. 2015-yilning fevralida Grande My Everything albomini ommalashtirish maqsadida ilk umumjahon turnesi boʻlgan The Honeymoon Tourni amalga oshirdi va bu turne davomida Shimoliy Amerika, Yevropa, Osiyo va Janubiy Amerika mamlakatlarida safarda boʻldi.

Grande uchinchi studiya albomi boʻlmish Dangerous Woman („Xavfli ayol“; dastlab nomi Moonlight („Oy nuri“) boʻlgan, keyinchalik nomini hozirgi nomga oʻzgartirgan) uchun qoʻshiqlar yozishni 2015-yilda boshlaydi. Ushbu albom 2016-yil 20-mayda chiqarildi hamda Billboard 200 chartida ikkinchi raqamli albom boʻldi. Shu yilning oktyabrida u albomning dastlab chiqishli singli boʻlgan „Focus“ni chiqardi; ashula Billboard Hot 100 chartida top yettinchi hit qoʻshiq boʻldi. Keyingi oyda amerikalik qoʻshiqchi Who Is Fancy oʻzining Grande va Meghan Trainor bilan birga ijro etgan „Boys Like You“ nomli ashulasini chiqardi. Keyinchalik, Grande ingliz ashulachisi Nathan Sykesning 2016-yil yanvarda chiqarilgan Unfinished Business studiya solo albomidagi „Over and Over Again“ ashulasining remiks versiyasini taqdim etadi. U, shunungdek, bosh rollarni Ben Stiller va Owen Wilson jonlantirgan komediya janridagi kartina boʻlmish Zoolander 2 filmida epizodik rolda koʻrinish berdi. Albomning keyinchalik chiqishli singli boʻlgan (albom nomi Moonlightdan Dangerous Womanga oʻzgargandan soʻng) „Dangerous Woman“ 2016-yil 11-martda chiqarildi hamda bu ashula Billboard Hot 100 chartida sakkizinchi raqamli qoʻshiq boʻldi. Albomning ikkinchi va uchinchi singllari — „Into You“ va „Side to Side“, mos ravishda chartda oʻn uchinchi va toʻrtinchi raqamli qoʻshiq boʻldi. Umuman olganda, albom tanqidchilar tomonidan xush qarshilandi. Albomni targʻib qilish maqsadida Grande 2016 Billboard Music Awards va MTV Video Music Awards taqdimotlarida qatnashdi. U, shuningdek, Saturday Night Live teledasturida ham boshlovchi, ham mehmon sifatida koʻrinish berdi. Grande 2017-yilda Dangerous Woman Tour davomida koʻplab mamlakatlarda, jumladan Shimoliy va Janubiy Amerika, Yevropa va Osiyoda boʻldi. 2017-yil 22-may sanasida Grandening Buyuk Britaniyaning Manchester shahrida joylashgan Manchester arenasidagi konsertida sodir boʻlgan portlash haqida koʻplab xabarlar paydo boʻldi. Politsiya maʼlumotiga koʻra, portlashda 22 kishi halok boʻlgan, 59 kishi esa jarohatlangan. Portlashdan soʻng, Grande turne safarining qolgan qismini toʻxtatdi hamda 4-yun kuni „One Love Manchester“ deb nomlangan yordam konsertini oʻtkazib, portlash qurbonlari va jabrlangan oilalarga yordam boʻlishi uchun $23 million miqdorda mablagʻ yigʻdi.

Grande 2016-yilda Pharrell Williams bilan toʻrtinchi albomi Sweetener uchun ashulalar yozishni boshladi, ammo „Manchesterda sodir boʻlgan hodisalar loyiha umidini keskin oʻzgartirdi“. Grande 2018-yil aprel oyida Sweetener albomining chiqishli singli oʻlaroq „No Tears Left to Cry“ qoʻshigʻini chiqardi va bu ashula Billboard Hot 100 chartida top uchinchi raqamni egallagan boʻlib, buning ortidan Grande ilk toʻrt albomining ilk singli ham Hot 100 roʻyxatida top oʻntalikka kirgan yagona artistga aylandi. Yaʼni, uning „The Way“ (Yours Truly albomidan), „Problem“ (My Everything albomidan), „Dangerous Woman“ (Dangerous Woman albomidan) va „No Tears Left to Cry“ singllari mos ravishda chartlarda 10-, 3-, 10- va 3-oʻrinlarni egallagan. Sweetener albomi chiqarilganidan olti oy oʻtgach, Grande beshinchi studiya albomi — Thank U, Nextni chiqardi. Keyinchalik, 2020-yilda uning oltinchi studiya albomi — Positions chiqarildi.

• Yours Truly (2013)
• My Everything (2014)
• Dangerous Woman (2016)
• Sweetener (2018)
• Thank U, Next (2019)
• Positions (2020)
• Eternal Sunshine (2024)