Abdulaziz Karim

Abdulaziz Karim (1973-yil 23-noyabr (1973-11-23) (52 yosh), Toshkent, Oʻzbekiston SSR) – taniqli oʻzbek qoʻshiqchisi, V. A. Uspenskiy nomidagi Respublika ixtisoslashtirilgan musiqa maktabi bitiruvchisi. 2005-yildan siyosiy taʼqiblarga uchrab, qidiruvda boʻlgan. Sanʼat sohasidagi ustozi Toʻlqin Umarovich Qurbonov hisoblanadi.

Abdulaziz Karim 2000-yilda Nihol mukofoti sovrindori boʻlgan. 2003-yilda esa Oʻzbekiston Respublikasida xizmat koʻrsatgan artist unvonini olgan.

Abdulaziz Karim musiqa maktabini 1991-yilda tamomlab, 1991—1996-yillarda Ashrafiy nomidagi Toshkent davlat konservatoriyasining kompozitsiya fakultetida taʼlim olgan. U 1 qismlik opera, 2 ta simfoniya va xor jamoasi uchun 70dan ortiq asarlar yozgan. Yevropa darajasidagi musiqa turlariga talab kamligi sababli 1998-yildan estrada yoʻnalishida ijod qila boshlagan.

Abdulaziz Karimning „Uzun armonlar“, „Qurbon boʻlaman“, „Yagonam oʻzing“ qoʻshiqlari hamda Rayxon Gʻaniyeva bilan hamkorlikda kuylagan „Erkatoyim mani yoqimtoyim“ dueti xit darajasiga koʻtarilgan.