Hans-Jürgen Gede

Oʻzining professional faoliyatini 1975-yilda ona shahrining „Shalke 04“ klubida yarim himoyachi sifatida boshlagan. „Schalke“ tarkibida 1977-yilgacha oʻynadi va shu vaqt ichida oʻttiz uchta oʻyinda maydonga tushib, ikkita gol urdi. Keyinchalik „Preussen“ klubiga oʻtdi va darhol asosiy tarkibdagi oʻrnini egallab, ikki mavsumda yetmish bir oʻyinda ishtirok etdi hamda 10ta gol urdi.

1979-yil oxirida Kyolnning „Fortuna“ klubi unga eʼtibor qaratdi va Gede klub bilan shartnoma imzoladi. „Fortuna“ tarkibida haqiqiy jamoa yetakchisiga aylandi va keyinchalik jamoa sardori boʻldi. Jurgen deyarli oʻn ikki yilni Fortuna safida oʻtkazdi va shu vaqt ichida 343 ta oʻyinda maydonga tushib, 48 ta gol urdi. Keyinchalik, 1991-yilda futbolchi sifatidagi faoliyatini yakunladi.

1991-yilda „Fortuna Dyusseldorf“ klubi bosh murabbiyiga aylandi va ikki mavsum ishladi. 1993-yilda Ali Parvinning yordamchisi boʻlish uchun Eronga taklif qilindi va Tehronning „Persepolis“ jamoasi murabbiylar shtabiga aʼzo boʻldi. 1994-yilda Ali Parvin isteʼfoga chiqarilganidan soʻng, „Persepolis“ga bosh murabbiy etib tayinlandi va 1994-yilgi mavsumni klub murabbiyligida yakunladi.

Oʻsha yilning boshida Eron yoshlar terma jamoasiga bosh murabbiy etib tayinlangan. Yoshlar jamoasida Hans-Jurgen Gede 1995-yil oxirigacha ishladi va isteʼfoga chiqdi.

1996-yil oʻrtalarida Germaniyaga qaytib, „KSV Hessen“ bilan shartnoma imzoladi, ammo keyingi mavsum oʻrtasida bosh murabbiylikdan boʻshatildi. Ishdan boʻshagach, 1998-yilgacha ishlamadi va faqat 1999-yilda Germaniyaning boshqa bir klubi – „Lippshtadt-08“ga rahbarlik qilishga taklif qilindi. 2001-yilning oʻrtalarigacha shu klubda ishladi.

Oʻsha yilning oʻrtalarida Oberxauzenning Rot-Vays klubiga bosh murabbiy yordamchisi sifatida qabul qilindi. 2003-yil boshida jamoani tark etgan.

2003-yil boshida Oʻzbekiston milliy futbol terma jamoasiga bosh murabbiy yordamchisi sifatida taklif qilingan, 2004-yilda terma jamoa bosh murabbiyi boʻlgan. Unga terma jamoani 2006-yilgi jahon chempionatiga olib borish vazifasi yuklangandi. Muvaffaqiyatsiz oʻyinlardan soʻng, ishdan boʻshatildi.

2005-2010-yillarda Gede turli mamlakatlarning turli klublarida ishlagan: Shahid Gandi (Eron), Al-Ahli (Bahrayn), Kuala-Lumpur (Malayziya), Neftchi Boku (Ozarbayjon), Oktta Yunayted (Myanma) va At-Tahaddi (Liviya).

2011-yil boshida Eronning „Istiqlol“ klubiga bosh murabbiy yordamchisi sifatida taklif qilingan va 2011-yilning oʻrtalariga qadar ishlagan. Eronning boshqa bir klubi – „Zob Ahan“da yordamchi murabbiy sifatida ish boshlagan.

2013-yil boshida „Zob Axan“ni tark etib, „Aluminium“ klubida yordamchi murabbiy, keyinroq bosh murabbiy boʻldi. 2014-yil boshida ishdan boʻshatildi.

2016-yilning fevralidan mayigacha „Vestfalenliga“ (6-divizion) klubi Hedefspor (Xattingen) bilan ishlagan. Oʻsha yilning iyun oyidan 2025-yilgacha Vyetnam terma jamoasida ishlagan. Vyetnam futbol federatsiyasida texnik direktor, „Vettel“ klubida texnik direktor, bosh murabbiy, „Binziyung“ jamoasida texnik direktor sifatida mehnat qildi. 2021-yilda OʻFA texnik direktorligiga ham nomzod sifatida koʻrsatilgan. Biroq bu tayinlov amalga oshmay qolgan.

2025-yil dekabr oyida Oʻzbekistonga qaytdi va Fargʻonaning „Neftchi“ jamoasida bosh murabbiy yordamchisi etib tayinlandi.