Abadiyat qonuni

Abadiyat qonuni (gruzincha: მარადისობის კანონი) — 1978-yilda gruzin yozuvchisi Nodar Dumbadze tomonidan yozilgan roman. Abadiyat qonuni romani nafaqat Gruziyaning oʻzida, balki koʻplab boshqa yurtlarda ham izlab topib oʻqiladigan asarlar qatoridan joy olgan. 1983-yilda oʻzbek tiliga tarjima qilinib 30 000 nusxada nashr etilgan. Keyinchalik 2011—2014-yillarda Sharq nashriyoti tomonidan hikoyalar bilan birga 463 betli qattiq muqovada qayta nashr etilgan.

Roman qahramoni yozuvchi Bachana Ramishvili yurak xurujidan soʻng kasalxonaga tushadi. Kasalxonada u butun hayotini birma-bir eslaydi va abadiyat qonunini kashf etadi.

Romanda insonning hayotdagi oʻrni, undan talab etiladigan fidoyilik, halollik, vijdonlilik, adolatparvarlik xususiyatlari toʻgʻrisida keng mushohada yuritilgan. Adibning aksariyat asarlaridagi voqea, hodisalar insonlar taqdiri oʻzining oʻtkir dramatizmi bilan birga samimiy yumori bilan ham oʻquvchi yodida uzoq saqlanib qoladi. Ushbu asarda ham voqealar keskin rivojlanadi. Bosh qahramon Bachana Ramishvili haqiqiy maʼnodagi sodda va samimiy yozuvchi obrazida tasvirlangan. U taʼmagirlarni va poraxoʻrlarni yomon koʻradi. Asarda mehr-oqibat, muhabbat, nafrat, shodlik, hayo va or-nomus tushunchalari uygʻunlashtirilgan.

Nodar Dumbadzening "Abadiyat qonuni" romani shunchaki yozuvchining fantaziyasi mahsuli emas balki uning o'z boshidan kechirgan hayot va o'lim orasidagi og'ir kurashining haqqoniy tasviridir. Asar bosh qahramoni jurnalist - Bachana Ramishvili prototipi bevosita Nodar dumbadzening o'zi hisoblanadi. Yozuvchi umrining oxirgi yillarida Miokard infarkti bilan kasallangan va uzoq vaqt davomida shifoxonalarda davolangan. Romandagi barcha kechadigan voqealar, u yerdagi og'ir, lekin insoniy iliqlikka boy muhit yozuvchi o'zi boshidan kechirgan voqealar asosida olingan.